پاکستان نے بھارت سے تجارتی سامان ‘غیر منصفانہ’ طور پر روکے جانے پراحتجاج کرتے ہوئے اس واقعے کی سخت مذمت کی

پاکستان نے بھارت سے تجارتی سامان ‘غیر منصفانہ’ طور پر روکے جانے پراحتجاج کرتے ہوئے اس واقعے کی سخت مذمت کی ہے۔ بھارتی حکام نے ممبئی کی بندر گاہ پر کراچی جانے والے جہاز کو اپنے قبضے میں لے رکھا ہے۔

پاکستان نے اتوار کے روز چین سے کراچی آنے والے ایک جہاز کو ”بلا جواز” ضبط کرنے کی وجہ سے بھارت پر شدید نکتہ چینی کی ہے۔ اسلام آباد نے بھارتی حکام کی کارروائی پر احتجاج کرتے ہوئے کہا کہ مذکورہ جہاز کمرشل ساز و سامان کی درآمد کا ایک ”سادہ کیس” تھا، جس کو بھارت نے غیر منصفانہ طور پر اپنے قبضے میں لے لیا۔

بھارتی خبر رساں ادارے پی ٹی آئی نے پہلی بار کراچی جانے والے جہاز کی ضبطگی کی خبر ہفتے کے روز شائع کی تھی، جس کے بعد پاکستان نے اتوار کے روز ایک بیان جاری کیا۔ البتہ ممبئی کی بندرگاہ پر جہاز روک کر تلاشی لینے کا یہ واقعہ جنوری کے اواخر میں پیش آیا تھا۔

بھارتی حکام کا دعویٰ ہے کہ جہاز کی تلاشی کے دوران اس طرح کی دوہرے استعمال کی مشینری ملی، جس کا استعمال جوہری پروگرام کے لیے بھی ہو تا ہے۔ پاکستان نے بھارت کے ان دعووں کو جھوٹا بتایا ہے۔

پاکستان نے کیا کہا؟
ایک ماہ سے بھی زیادہ وقت گزر جانے کے بعد جب سنیچر کے روز بھارتی حکام نے کراچی جانے والے جہاز کی ضبطگی کے بارے میں میڈیا کو بتایا، تو اتوار کے روز اسلام آباد میں صحافیوں نے اس بارے میں سوال کیا۔ اس کے جواب میں پاکستانی دفتر خارجہ نے ایک بیان جاری کیا اور کہا کہ بھارتی میڈیا کی یہ رپورٹس ”حقائق کے برعکس غلط بیانی” پر مبنی ہیں۔

بیان میں کہا گیا، ”یہ کراچی میں مقیم اس تجارتی ادارے کی طرف سے کمرشل لیتھ مشین کی درآمد کا ایک سادہ سا معاملہ ہے، جو پاکستان میں آٹوموبائل انڈسٹری کو پرزے فراہم کرتا ہے۔ آلات کی تفصیلات واضح طور پر اس کے خالصتاً تجارتی استعمال کی نشاندہی کرتی ہیں۔ اس کے لین دین میں شفافیت کے لیے تمام متعلقہ دستاویزات کے ساتھ باضابطہ بینکنگ چینلز کے ذریعے کی جا رہی تھی۔”

پاکستان نے تجارتی سامان ضبط کرنے کے حوالے سے بھارت کی سخت الفاظ میں مذمت کی اور کہا، ”آزاد تجارت میں یہ رکاوٹ مشکوک اسباب کی بنا پر ریاستوں کی طرف سے پولیسنگ کے کردار میں من مانی مفروضے کے خطرات کی نشاندہی کرتی ہے۔ اس طرح کی کارروائیاں بین الاقوامی اصولوں کی خلاف ورزی کرنے اور ایسی خلاف ورزیوں میں غیر قانونی اقدامات کرنے میں بعض ریاستوں کے بڑھتے ہوئے استثنیٰ کو بھی اجاگر کرتی ہیں۔”

پاکستانی حکام نے اسے ”غیر منصفانہ ضبطگی” قرار دیتے ہوئے کہا کہ ”متعلقہ نجی ادارے اس معاملے کی پیروی کر رہے ہیں ” اور بتایا کہ یہ ”بین الاقوامی اصولوں کی صریح خلاف ورزی” ہے۔

جہاز کی ضبطی سے متعلق مزید تفصیلات
چین سے پاکستان جانے والے جہاز سی ایم اے سی جی ایم اٹالیہ کو ممبئی کی نہوا شیوا بندرگاہ کے پاس روکا گیا تھا۔ بھارتی حکام کے مطابق کسٹم حکام نے انٹیلیجنس کی اطلاعات پر عمل کرتے ہوئے مالٹا کے جھنڈے والے تجارتی جہاز کو 23 جنوری کے دن کراچی جانے والے راستے میں روکا تھا۔

حکام نے خبر رساں ایجنسی پی ٹی آئی کو بتایا کہ بھارتی دفاعی ادارے ‘ڈیفنس ریسرچ اینڈ ڈیولپمنٹ آرگنائزیشن’ (ڈی آر ڈی او) کی ایک ٹیم نے اس جہاز پر لدے سامان کی جانچ کی تھی۔

ان کے مطابق اس میں لدے سامان میں ایک عددی کنٹرول والا خصوصی کمپیوٹر سسٹم ‘سی این سی’ بھی شامل تھا اور ڈی آر ڈی او نے پاکستان کے جوہری پروگرام میں اس کے ممکنہ استعمال کی تصدیق کی ہے۔ سی این سی کمپیوٹر سسٹم کنٹرول شدہ اپنی درستگی اور کارکردگی کے لیے مشہور ہے۔

=========
صلاح الدین زین ڈی ڈبلیو، نئی دہلی