دربھنگہ : قرآن کریم پوری انسانیت کیلئے ہدایت ہے :مولانا خالد نیموی، مدرسہ رشیدیہ رسول پور نستہ میں دعائیہ تقریب کا انعقاد

Taasir Patna
==========
قرآن کریم پوری انسانیت کیلئے ہدایت ہے :مولانا خالد نیموی،
مدرسہ رشیدیہ رسول پور نستہ میں دعائیہ تقریب کا انعقاد
دربھنگہ 10 فروری (ثاقب ضیاء) :
قرآن کریم پوری انسانیت کیلئے ہدایت ہے، جس شخص کی نسبت قرآن کریم سے ہوجائے اللہ تعالیٰ اس کا مرتبہ بڑھا دیتے ہیں مذکورہ باتیں مدرسہ رشیدیہ رسول پور نستہ کے تین تکمیل حفظ قرآن کریم کی سعادت حاصل کرنے والے طلبہ کے اعزاز میں جامع مسجد نستہ میں منعقد ایک دعائیہ تقریب سے خطاب کرتے ہوئے حضرت مولانا خالد نیموی قاسمی بیگوسرائے نے کہی انھوں نے کہا کہ قرآن کریم یہ اللہ تعالیٰ کا کلام ہے اور یہ کلام اللہ تعالیٰ کی صفت ہے اس لئے ہر صاحب ایمان والوں کیلئے ضروری ہے کہ وہ قرآن کریم کی تکریم و تعظیم کرے قرآن کریم کی تکریم کا مطلب یہ نہیں ہے کہ اسے کسی اونچی جگہ رکھ دیا جائے بلکہ تکریم و تعظیم کا مطلب یہ ہے کہ اس کو ایسی جگہ رکھے جو جگہ پاک بھی ہو اور اونچی بھی جہاں آسانی کے ساتھ آپ کے ہاتھوں کی رسائی ہو اور آپ اپنے دن کا آغاز قرآن کریم کی تلاوت سے کیا کریں یعنی دیگر شیڈول کی طرح تلاوت قرآن بھی آپ کے روز مرہ معمول ہوجائے ۔ انھوں نے کہا کہ امت محمدیہ اس لئے عظیم ہے کہ اس کو قرآن کریم کی نسبت لگی ہے نسبت ہی کی وجہ ہم وسط امت اور خیر امت ہوگئے۔بتادیں دعائیہ تقریب کی صدارت حضرت مولانا صفی الرحمن قاسمی نے فرمائی جبکہ نظامت کے فرائض مولانا امان اللہ نستوی نے احسن طریقے سے انجام دیا۔ تقریب کا باضابطہ آغاز طلبہ مدرسہ ہذا کی تلاوت قرآن کریم سے ہوا وہیں طلبہ نے نعتیہ کلام کا گلدستہ پیش کر سامعین و ناظرین سے خوب دادو تحسین حاصل کی اس موقع پر مولانا احمد سعید قاسمی نے کہا کہ جب اللہ تعالیٰ نے عالم ارواح میں سوال کیا تھا، کیا میں تمھارا رب نہیں ہوں اس وقت سب سے پہلے اللہ کے رسول پیغمبر ہادی صلی اللہ علیہ وسلم نے پھر تمام روحوں نے بلا تامل کہا تھا ہاں آپ ہمارے رب ہیں آج اللہ تعالیٰ کی وحدانیت کا اقرار کرنے والے اور نبی اکرم صلی اللہ علیہ وسلم کو اپنا رسول برحق تسلیم کرنے والوں میں زیادہ تر لوگوں کا حال یہ ہے کہ وہ اللہ تعالیٰ کے احکامات سے دوری اختیار کر اپنی منمانی زندگی گزار رہے ہیں انھوں نے کہا کہ جب اللہ تعالیٰ پوچھے گا یہ تو خیر امت تھی یہ کیوں گمراہ ہوئی اس وقت نبی صلی اللہ علیہ وسلم کہیں گے اس نے قرآن کریم کو چھوڑ دیا ہے جب سے ہم نے قرآن کریم کو چھوڑا ہے پوری دنیا میں ہماری حیثیت پھوٹی کوڑی جیسی ہوگئی ہے ہم تو دنیا میں مقتدا اور رہنما بنا کر بھیجے گئے تھے لیکن اپنی بےعملی کی وجہ سے محکومانہ اور غلامانہ زندگی گزار نے پر مجبور ہیں ،انھوں نے کہا کہ اپنے بچوں کی اچھی تربیت کر انھیں علم دین سے آراستہ کرنا بھی صدقہ جاریہ ہے آپ خود بھی قرآن پڑھیں اور اپنی اولاد کو بھی قرآن کریم کے زیور اراستہ کریں واضح رہے کہ محمد لطیف الرحمن ابن محمد غزالی،یاور اقبال ابن تقی احمد مرحوم نستہ اور محمد ساجد حسین ابن نبی حسن،نے تکمیل حفظ قرآن کریم کی سعادت حاصل کی ہے جبکہ افضل امام، اسعد امام ابن مولانا ظفر امام نے حفظ اور ابوحذیفہ ابن مظفر امام مرحوم نے حضرت مولانا صفی الرحمن قاسمی کے سامنے ناظرہ قرآن کریم شروع کرنے کی سعادت حاصل کی ہے مدرسہ رشیدیہ رسول پور نستہ مدرسہ کے صدر پروفیسر عامر نشاط و سابق مکھیا شمس الہدی، حاجی محمد دین، سعید اللہ خالد، ظفر امام ،اور نجمی صاحبان وغیرہ کی دیکھ ریکھ میں تعلیمی ترقی کی راہ پر گامزن ہے اس تقریب سعید میں مدرسہ ہذا کے اساتذہ مفتی سجاد عالم،حافظ ساجد حسین ، ماسٹر شکیل ، کے علاوہ مولانا مظہر امام، محمد افضال، محمد اعجاز ، محمد تبریز، محمد انجم وغیرہ موجود تھے