انڈونیشیا گزشتہ ایک برس سے چین کے ساتھ جے ٹین طیاروں کی خریداری کے لیے بات چیت کر رہا ہے : رپورٹ

انڈونیشیا کے مطابق وہ گزشتہ ایک برس سے چین کے ساتھ جے ٹین طیاروں کی خریداری کے لیے بات چیت کر رہا ہے، تاہم اب پاکستانی جے ٹین طیاروں کے ہاتھوں بھارتی طیارے مار گرائے جانے کی رپورٹس بھی مدنظر رکھے گا۔

انڈونیشیا کے مطابق ملکی افواج کو جدید بنانے کے سلسلے میں کاوشیں جاری ہیں اور وہچینی ساختہ جے ٹینجنگی طیارے خریدنے پر غور کر رہا ہے۔ انڈونیشیا کے مطابق یہ نسبتاً سستے اور جدید صلاحیتوں کے حامل ہیں۔ ساتھ ہی انڈونیشیا امریکی ساختہ ایف پندرہ ای ایکس طیاروں کی خریداری کو حتمی شکل دینے پر بھی غور کر رہا ہے۔

دنیا کی سب سے بڑی مسلم آبادی والے ملک انڈونیشیا نے حالیہ برسوں میں اپنی پرانی فوجی مشینری کو جدید بنانے کی کوششیں شروع کر رکھی ہیں۔ 2022 میں، انڈونیشیا نے 8.1 ارب ڈالر مالیت کے 42 فرانسیسی رافیل طیارے خریدے، جن میں سے چھ طیارے آئندہ سال فراہم کیے جائیں گے۔

انڈونیشی نائب وزیر دفاع اور ریٹائرڈ ایئر مارشل ڈونی ایرماوان تاؤفانتو نے کہا،”ہماری چین سے بات چیت ہو رہی ہے اور انہوں نے ہمیں بہت کچھ پیش کیا ہے، صرف J-10 ہی نہیں بلکہ بحری جہاز، اسلحہ، اور فریگیٹس بھی۔‘‘

انہوں نے مزید کہا کہ اس ممکنہ خریداری پر ایک سال سے زیادہ عرصے سے غور کیا جا رہا ہے، تاہم اب انڈونیشیا ان رپورٹس کو بھی مدنظر رکھے ہوئے ہے کہ پاکستانی جے ٹین طیاروں نے کئی بھارتی طیارے مار گرائے۔

تاؤفانٹو نے بتایا کہ جکارتہ امریکی ساختہ F-15EX طیاروں کی خریداری کے اگلے مرحلے پر بھی غور کر رہا ہے، جو 2023 میںامریکی طیارہ ساز کمپنی بوئنگ کے ساتھ وزارتِ دفاع کے معاہدے کے تحت خریدے جا رہے ہیں۔

انہوں نے کہا کہ امریکی طیاروں کی صلاحیتیں آزمودہ ہیں، لیکن 24 طیاروں کے لیے 8 ارب ڈالر کی طے کردہ قیمت اب بھی سوالیہ نشان ہے۔

فرانسیسی صدر ایمانوئل ماکروں نے گزشتہ ہفتے جکارتہ میں انڈونیشیا کے صدر پرابوو سبیانتو سے ملاقات کے بعد کہا تھا کہ دونوں ممالک نے ایک ابتدائی دفاعی معاہدہ کیا ہے، جس کے تحت فرانسیسی ہتھیاروں، بشمول رافیل طیاروں کی نئی خریداری ممکن ہے۔

تاؤفانٹو نے کہا، ”ہم فرانس کی پیشکش پر غور کر رہے ہیں اور اپنے بجٹ پر بھی، ہم تجزیہ کر رہے ہیں، خاص طور پر جب ہمارے پاس J-10 اور F-15 جیسے دیگر آپشنز بھی موجود ہیں۔‘‘

=============

عاطف توقیر روئٹرز کے ساتھ