اسرائیلی فضائی حملے میں بچوں اور خواتین سمیت کم از کم 12 افراد ہلاک ہوگئے

غزہ میں شہری دفاع کی ایجنسی نے بُدھ کے روز کہا کہ جنوبی شہر خان یونس کے قریب بے گھر فلسطینیوں کے ایک خیمے پر اسرائیلی فضائی حملے میں بچوں اور خواتین سمیت کم از کم 12 افراد ہلاک ہوگئے ہیں۔

ایجنسی کے ترجمان محمود بسال نے اے ایف پی کو بتایا کہ دیگر حملوں میں مزید چار افراد مارے گئے ہیں۔ اسرائیلی فوج نے فوری طور پر اس واقعے پر تبصرے کے لیے اے ایف پی کی درخواست کا جواب نہیں دیا۔

مارچ میں جنگ بندی کے خاتمے کے بعد سے، اسرائیل نے فلسطینی گروپ حماس کو ختم کرنے کے لیے اپنی کارروائیاں تیز کر دی ہیں۔ حماس نے سات اکتوبر 2023 کو جنوبی اسرائیل میں ایک بڑا دہشت گردانہ حملہ کیا تھا، جس میں قریب بارہ سو اسرائیلی شہری ہلاک ہو گئے تھے۔ اس دہشت گردانہ واقعے نے اس جنگی تنازعے کو جنم دیا۔

غزہ میں حماس کے زیر انتظام کام کرنے والی وزارت صحت کا کہنا ہے کہ اسرائیل کی جانب سے 18 مارچ کو دوبارہ کارروائی شروع کرنے کے بعد سے اس علاقے میں کم از کم 4,240 افراد ہلاک ہو چکے ہیں، جس سے جنگ میں ہلاکتوں کی مجموعی تعداد 54,510 ہو گئی ہے، جن میں زیادہ تر عام شہری ہیں۔

تازہ ترین اسرائیلی حملوں کے بارے میں خان یونس کے رہائشیوں کا کہنا ہے کہ اسرائیلی نے فوج خان یونس کے کچھ حصوں پر ٹینک کی گولہ باری کے ایک دن بعد فضائی حملوں میں اضافہ کر دیا ہے اور مکینوں کو خبردار کیا ہے کہ وہ اپنے گھروں کو چھوڑ کر مغرب کی طرف بڑھیں۔ اسرائیل کا کہنا ہے کہ اس کی فورسز ان علاقوں میں حماس اور دیگر عسکریت پسندوں کا مقابلہ کریں گی اور اس کا ہدف عسکریت پسند ہیں جنہیں وہ ختم کرنا چاہتا ہے۔

===========

کشور مصطفیٰ (اے ایف پی، روئٹرز)